Estrasburgo, 23 de xaneiro de 2025. No pleno do Parlamento Europeo, a eurodeputada do BNG, Ana Miranda, denunciou a grave situación do rural galego, ao que definiu como inmerso nun verdadeiro “inverno demográfico”. Problemas de transporte, emprego precario e discriminación das pequenas e medianas explotacións agrarias figuran entre as principais ameazas que sinalou no debate sobre os retos demográficos da Unión Europea.

“Quedan só dúas opcións, señora comisaria: a precariedade laboral ou emigrar”, afirmou Miranda, quen puxo o foco na situación dos agricultores e gandeiros galegos. Segundo explicou, moitas destas explotacións, xestionadas por persoas mozas e mulleres, apóstanlle á sustentabilidade, alimentando o gando con pasto natural e certificándose baixo a denominación de orixe Ternera Galega Suprema.

Con todo, Miranda alertou de que o Goberno galego está a impulsar cambios nas normas de alimentación, incentivando o uso de ración concentrada. Estes cambios, advertiu, “poden excluír aos pequenos agricultores e abandonar o rural”, un risco que considera inaceptable.

Un modelo sustentable en perigo

A modificación proposta na Indicación Xeográfica Protexida (IXP) Ternera Galega, creada nos anos 90 para distinguir a calidade da produción tradicional galega, suporía un duro golpe para máis de 750 granxas que optan pola gandaría en extensivo. Segundo Miranda, este cambio busca industrializar a IXP, penalizando a sostibilidade e a calidade que caracterizan ás pequenas e medianas explotacións.

Nunha intervención firme, a eurodeputada galega destacou que estas granxas non só rexeneran os pastos e melloran a calidade dos solos, senón que tamén son esenciais para un medio rural vivo, ao contribuíren á sostenibilidade económica, ambiental e social do agro galego.

Para Miranda, a situación require unha resposta inmediata e clara por parte das institucións europeas e galegas. “Debemos defender o modelo de gandería tradicional que representa a esencia do noso rural e o futuro das nosas comunidades”, concluíu.