O Bloque considera inadmisíbel que o Goberno da Marea, que se laia constantemente dos bloqueos que sufre da oposición, non executara nin tan sequera as actuacións que o propio Executivo avanzou que realizaría ao longo de 2016, e xa co orzamento aprobado, e cuestiona a capacidade dos responsábeis da concellaría, mais preocupados pola propaganda que polas actuacións reais nos barrios, que volven a estar abandonados durante este mandato

A Coruña, 26 de xaneiro de 2017.- O Bloque Nacionalista Galego vén de presentar esta mañá en rolda de prensa un informe (pódese descargar neste enlace: https://drive.google.com/file/d/0Byms2PHRb4h4N0dfdVpDUWJZYVk/view)  no que se pon de manifesto que o 95 % das actuacións anunciadas polo Goberno municipal para 2016 non foron completadas.

Deste xeito, as nacionalistas lembraron na comparecencia que no seu momento manifestaran a súa satisfacción despois de que o concelleiro de rexeneración Urbana e Dereito á Vivenda, Xiao Varela, presentara, a mediados do ano pasado, e unha vez que xa foran aprobados os orzamentos, o Plan de Intervención Urbana para 2016, xa que logo a maioría das actuacións nas que se centraba o plan foran achegadas por eles como propostas aos propios orzamentos.  

“Naquel momento fixemos publica a nosa idea de que esas actuacións daban resposta a necesidades reais e que foramos recollendo polos barrios. Estaban incluídas no programa #TodasAsCoruñas co que nos presentamos ás elección municipais e insistimos durante o proceso de negociación dos orzamentos de 2016 que as actuacións eran urxentes e necesarias, e presentámolas como emenda aos mesmos. Entendiamos que despois dos anos de abandono ao que se viran sometidos no mandato anterior os barrios da cidade debían ser unha prioridade e recuperar o ser protagonismo” indicaron na súa comparecencia as nacionalista.

“Mais levámonos unha sorpresa (continuaron as nacionalista nas súa intervención) cando logo de comezar a facer o seguimento das actuacións, fomos comprobando, ben in situ, ben a través da lectura das resolucións, decretos e o perfil do contratante, que non se estaban a executar coa operatividade e axilidade que o propio concelleiro Xiao Varela anunciara que se ían facer; entendemos que o noso deber non remata con propoñer as actuacións, indo máis ala, facendo tamén control e seguimento destas e comprobar o nivel de execución”.

Así, segundo o Bloque, e despois de elaborar o informe de seguimento das 57 actuación anunciadas polo Goberno municipal, só 3 foron realizadas integramente, 13 actuación foron realizadas parcialmente e 41, 3 de cada 4 intervencións, non foron executadas ao longo de 2016.

“As actuacións anunciadas desde a concellaría de Rexeneración Urbana e Dereito á vivenda atendían as áreas, entre outras, de mellora de vías e espazos públicos, mobilidade, accesibilidade, iluminación, saneamento ou rehabilitación, obras necesarias e urxentes, que chegaron a cualificarse como «demandas históricas dos barrios»; preguntámonos porque non se realizaron cando se anunciou a bombo y platillo que ían a ser licitadas e executadas antes de 2017. Isto para nós é inadmisíbel e esiximos que dea explicación de inmediato de porque non foron executadas nos prazos que eles mesmos se marcaron para realizas”, inquiriu Avia Veira durante a súa intervención.

Asemade, o Grupo Municipal do BNG pregúntase que impedimentos foron os causantes para que a xestión para a realizacións destas obras no tempo sinalado e  considera inadmisíbel que o Goberno da Marea, que se laia constantemente dos bloqueos que sufre da oposición, non executara nin tan sequera as actuacións que o propio Executivo avanzou que realizaría ao longo de 2016, e xa co orzamento aprobado, e cuestiona a capacidade dos responsábeis da concellaría, mais preocupados pola propaganda que polas actuacións reais nos barrios, que volven a estar abandonados durante este mandato.

Por último, as nacionalistas xa avanzaron que presentaran unha batería de preguntas no próximo pleno ordinario a respecto da situación actual destas obras e os novos prazos para que se executen.

“Desde logo cremos que a xestión que realizou a concellaría foi nefasta. Mais ben nula, non existiu, e consideramos máis que necesario que o concelleiro dea explicacións e dea conta pública pois logo cremos que os barrios non poden estar na mesma situación de abandono que sufriron durante o mandato do Partido Popular”, concluíu a concelleira nacionalista Avia Veira.