Estrasburgo, 11 de febreiro de 2025 – A eurodeputada do BNG, Ana Miranda, aproveitou a súa intervención no pleno do Parlamento Europeo para denunciar a precariedade laboral do persoal sanitario en Galiza e o deterioro da sanidade pública. No marco do debate sobre a “Necesidade de abordar a acuciante escaseza de man de obra e garantir postos de traballo de calidade no sector da asistencia sanitaria”, Miranda salientou que “se queremos atención sanitaria de calidade, os profesionais precisan o recoñecemento dos seus dereitos laborais e traballo digno”.  

A eurodeputada galega criticou con dureza a situación do sistema sanitario en Galiza, onde “a precariedade laboral no eido sanitario debido ao abuso de contratos temporais é o normal”. Miranda destacou que “faltan traballadoras e traballadores na saúde, faltan investimentos públicos e faltan salarios dignos e acceso a tratamentos”.  

Como exemplo da gravidade da situación, Miranda puxo de manifesto a falta de persoal de enfermería en Galiza en comparación coa media europea. “Se a media europea de enfermeiras é de 8,5, e a media do Estado español é de 6,3, a media en Galiza é de 5,1, a peor taxa de profesionais de enfermería da Unión Europea”, denunciou.  

A líder do BNG no Parlamento Europeo insistiu en que “é imprescindible que os profesionais da saúde teñan condicións de traballo dignas para garantir a calidade dos sistemas sanitarios e para garantir os coidados que, lamentablemente, a dereita e a extrema dereita se empeñan en desmantelar e privatizar, como fai o goberno do PP na miña terra”.  

Miranda aproveitou a súa intervención para saudar á plataforma Sos Sanidade Pública, recoñecendo o seu labor na defensa dun sistema sanitario público e de calidade. A súa intervención no pleno europeo puxo o foco nas carencias do sistema sanitario galego e na necesidade de adoptar medidas urxentes para mellorar as condicións laborais do persoal sanitario e garantir unha atención digna á cidadanía.