Fernando Souto, presidente da Comisión pola Recuperación da Memoria Histórica da Coruña, participou esta mañá nunha rolda de prensa xunto aos deputados coruñeses de En Marea, Yolanda Díaz e Antón Gómez-Reino.

Os deputados presentaron as iniciativas que o seu grupo levará ao Congreso coa intención de frear as actuacións que está levando a cabo a Fundación Franco, contrarias a Lei da Memoria Histórica.

“Agradecemos a todos os partidos, e neste caso a En Marea, calquera iniciativa en prol dos dereitos humanos, porque é nese marco onde hai que situar estas iniciativas: no da defensa dos dereitos humanos fronte a una entidade que se financia con cartos públicos e que pretende violar a lei. Nos entendemos que o Estado non pode subvencionar a fundacións que animen a incumprir a lei ou elas mesmas a incumpran”, dixo Fernando Souto.

A Fundación Franco enviou recentemente cartas a máis de trescentos concellos de todo o Estado nas que ofrece asesoramento xurídico gratuíto para axudalas a incumprir a Lei da Memoria Histórica, como está acontecendo no caso do concello de Callosa de Segura, en Murcia. Os deputados non souberon precisar se algunha desas cartas chegou a concellos coruñeses ou galegos.

“Dicimos non a elementos que veñan a dificultar a convivencia e animamos a todos os partidos, en especial ao Partido Popular, a que se aveña a falar sobre a memoria histórica e axude a convertela nunha cuestión de Estado en base aos principios de xustiza, verdade, reparación e garantías de non repetición, expresados por Nacións Unidas”, subliñou o presidente da CRMH.

As iniciativas que presentará o grupo de En Marea-Unidos Podemos no Congreso de Madrid solicitan, por unha banda, información a Goberno sobre os recursos públicos que recibe a Fundación Franco; por outra, que se modifique a normativa estatal sobre as fundacións para que se prohiba de modo expreso a exaltación das ditaduras e se establezan causas de extinción das fundacións cando incumpran a lei. E finalmente instan a Goberno que actúe contra os patronos da Fundación Franco se teñen incorrido nalgunha ilegalidade coas súas actuacións ou pronunciamentos públicos.