Estrasburgo, 27 de novembro de 2024 – O eurodeputado galego do PSdeG-PSOE, Nicolás González Casares, votou hoxe a favor da nova Comisión Europea, que contará con Teresa Ribera como vicepresidenta para a Transición Limpa, Xusta e Competitiva. Ribera, ex vicepresidenta do Goberno español, será o número 2 da presidenta Ursula Von der Leyen, liderando un dos retos máis importantes para o futuro da Unión.

O apoio socialista, expresado durante a sesión plenaria no Parlamento Europeo, busca consolidar unha Comisión forte para afrontar os desafíos actuais. “Europa necesita saír da interinidade e contar cunha Comisión en plenas capacidades a partir do 1 de decembro. A actual non é a mellor, pero é a mellor posible”, afirmou González Casares, que defendeu o voto favorable como un compromiso cunha Europa que aposte polo Pacto Verde, a protección das liberdades e o desenvolvemento industrial.

Críticas ao PP e defensa dos intereses galegos

O eurodeputado socialista non escatimou críticas ao Partido Popular e aos seus representantes galegos no Parlamento Europeo. “É inconcebible e ridículo que o PP vote en contra dunha presidenta do seu propio partido e dun acordo entre os principais partidos proeuropeos, aliándose coa ultradereita e os inimigos de Europa. Esta actitude é contraria aos intereses de Galicia e da cidadanía galega”, denunciou González Casares.

O socialista subliñou o retorno do comisario de Pesca, un logro que atribuíu ás demandas socialistas, e acusou o PP de incoherencia. “Hai cinco anos votaron a favor dunha Comisión sen esta figura, pero agora opóñense cando se recupera. Así demostran o pouco que lles preocupa o sector pesqueiro galego”, afirmou.

Unha aposta pola transición ecolóxica e a cohesión social

Teresa Ribera, como vicepresidenta da nova Comisión Europea, terá un papel clave na transición enerxética e na loita contra o cambio climático, aspectos que González Casares considera prioritarios para Galicia e o conxunto da Unión. “Aposta por unha Europa máis limpa, xusta e competitiva. Iso significa emprego, investimento e un futuro máis sostible para todos”, destacou o eurodeputado.

Co seu voto, o PSdeG reitera o seu compromiso cunha Europa que invista no desenvolvemento económico e social, fronte aos discursos que, segundo González Casares, só buscan “destruir o proxecto europeo e prexudicar os intereses da cidadanía galega e española”.