As exposicións fotográficas con imaxes de Ricard García Vilanova, Juan Carlos Tomasi, Silvia Landi, Lys Arango, Pablo Tosco, Javier Teniente e Rodrigo Zaim, que balizan os Xardíns de Méndez Núñez e os Cantóns,  seguirán ata o 7 de xullo.   

A Coruña, 13 de xuño 2022.- Tres días intensos nos que os Xardíns de Méndez Núñez transformáronse nun espazo para a defensa dos Dereitos Humanos e as persoas vulnerables que padecen Fame. Iso foi #FameeRefuxio, o VI Encontro Acampa pola Paz e o Dereito a Refuxio que se clausurou o sábado na Coruña. Pero Rede Acampa xa mira cara ao 2023. Toca empezar a pensar no que será o VII Encontro Internacional, que versará sobre unha dicotomía “Odio ou Convivencia” en cuxo lado debería ser ben fácil decantarse… 

Nin o vandalismo no Campo de Interpretación da Fame da noite do xoves -cando un grupo que facía botellón rompeu algunhas das figuras e roubaron pezas e material- nin a provocación de catro  preadolescentes na caseta dunha das organizacións integrantes da Rede ao berro de ‘Somos de VOX’ desluciron en nada o desenvolvemento do VI Encontro Internacional Acampa pola Paz. “É verdade que como sociedade deben preocuparnos –e moito- estes incidentes, porque reflicten de maneira preocupante o que estamos a facer mal no campo da educación”, explicou o coordinador do Movemento Acampa, Xosé Abad. “Pero é unha mancha diminuta se o comparamos coa resposta dos coruñeses e coruñesas cara á nosa proposta reflexiva. Sabiamos que a cidade é unha urbe aberta e tolerante. Pero eses cheos na carpa central para escoitar aos que saben, relatores, activistas e fotoperiodistas, falando sobre a realidade da fame, fainos sentir indiscutiblemente orgullosos e seguros de que o traballo de Rede Acampa ten un público fiel que quere estar informado, con conciencia crítica”.  

Outro dos aspectos destacables deste VI Encontro Internacional foi a visita de varios colexios e institutos da Coruña e a súa contorna ao Campo de Interpretación da Fame, un espazo no que puideron escoitar as explicacións de Marga González, de Amnistía Internacional, sobre a realidade da fame, as súas causas e consecuencias para 811 millóns de persoas no mundo. “A receptividade dos máis pequechos é incrible. Oxalá os adultos reaccionásemos así e sensibilizásemosnos como o fan eles”, explica Abad, lembrando que nesa idea coincidiu outro dos convidados, Guillermo Fesser, quen dixo que o mellor que se podía facer era sentar a un neno ou unha nena fronte ao documental que dirixiu xunto ao seu irmán, “O monstro invisible”, sobre a vida duns nenos filipinos que recollen lixo na entulleira dun poboado de Mindanao. “Que o vexan. Xa pensan eles sós. Non hai nada que explicarlles. Son moito máis listos que os adultos”. 

Odio ou Convivencia 

Como cada ano, as distintas organizacións que integran Rede Acampa, máis de 80 neste momento, reuníronse no marco do VI Encontro Internacional para elixir o tema sobre o que versará a proposta do seguinte ano. Non houbo moitas dúbidas. “Odio ou Convivencia” gañou por goleada. Non en balde, “o crecemento do odio a nivel global, a diminución da tolerancia social ao diferente, nun momento en que os tránsitos migratorios multiplicaranse e millóns de persoas camiñarán á procura de refuxio, debería estar na primeira liña das preocupacións de sociedades, gobernos e estados. “Vemos como os Estados Fortaleza atrincheiranse detrás dunhas fronteiras cada vez máis infranqueables, alimentando o odio e multiplicando o rexeitamento aos que chegan ás súas costas ou tentan atravesar os seus países; volvemos invisibles aos máis vulnerables, despersonalizámolos. Permitimos que a ultradereita, coas súas mensaxes xenófobas, teña voz e estenda a súa mancha. Permanecemos impasibles ao crecemento do odio”, explica Xosé Abad, coordinador de Rede Acampa. “Por iso é máis que oportuno reflexionar sobre esta dicotomía, ter claro de que lado hai que estar e estalo dunha forma militante”, concluíu, non sen antes convidar a todos a visitar e asomar ás exposicións fotográficas de #FameeRefuxio que balizan os Xardíns e Cantóns que permanecerán na rúa ata o 7 de xullo.