O grupo de galegas8mOleiros, quere informar, a través deste comunicado que, tras ter comezado no mes de decembro as reunións para preparar a convocatoria do 8 de marzo de 2021, este luns culmirarán as actividades, actos e intervencións de rúa programadas coa manifestación do 8 de marzo en Oleiros.
Oleiros a 5 de marzo de 2021- Galegas8m é a plataforma que mobiliza as mulleres do país cada 8 de marzo en clave galega, diversa, inclusiva e horizontal.
Convocamos unha concentración que, como nos anos anteriores, levará a reivindicación feminista ás rúas o luns 8 de marzo na Praza Esther Pita ás 19.30h, baixo o lema SEN COIDADOS NON HAI VIDA. MULLERES EN FOLGA: ESENCIAIS, PRECARIZADAS E FARTAS!!!
Como nos anos anteriores, queremos que o 2021 en Galiza e, este ano en concreto en Oleiros, volte a ser un referente na mobilización das mulleres a nivel global, có berro do feminismo, tinxindo as rúas de lila.
Este 8 de marzo, novamente, poñemos os coidados no centro das nosas reivindicacións. Porque o traballo de coidados debe ser o centro e motor da vida. Visibilizaremos o que está invisibilizado.
Este ano voltaremos a convocar folga de 24 horas de mulleres, e facemos un chamamento ás mulleres galegas a sumarse, en concreto, ás mulleres de Oleiros a participar no acto convocado
Contra un sistema, capitalista e patriarcal que asigna ás mulleres as tarefas de coidado, xerando o poder do mundo público e masculino, desvinculado dos tempos biolóxicos e ecolóxicos. E para concienciar da importancia de todos eses traballos invisíbeis que permiten a reprodución e o mantemento da vida, porque sen nós o sistema cae.
Porque os traballos dos coidados que son remunerados, realízanse en condicións de precariedade e son infravalorados tanto social como economicamente, mesmo a pesares de resultaren actividades esenciais.
Pola corresponsabilidade tanto no reparto de tempos coma de traballos.
Contra a privatización dos servizos esenciais para o coidado, residencias, servizos de axuda no fogar, escolas infantís,... que enchen o peto duns poucos, a costa de escravizar a moitas.
Para denunciar que na xestión da pandemia, as medidas laborais para a conciliación consistiron en reducir a xornada ou abandonara o traballo, abocando as mulleres a unha perda do seu nivel adquisitivo.
Porque o traballo a distancia foi unha trampa para un importante número de mulleres, que sofren un detrimento da saúde física, emocional de psicolóxica.
Para esixir dereitos para maternar de forma digna, denunciar a violencia exercida contra as nais.
Para denunciar a precariedade das pensións das mulleres galegas.
Para esixir que as empregadas do fogar deixen de formar parte dun réxime especial.
Polos miles de mozas que se viron obrigadas a emigrar nas últimas décadas.
Por todas aquelas mulleres que foron agredidas e desatendidas en plena pandemia.
Porque esta pandemia levou a unha situación límite a moitas mulleres que xa estaban nunha situación de exclusión, pobreza, e precariedade.
Pola demanda de despatoloxización e de autodeterminación, das mulleres trans.
Pola situación de especial vulnerabilidade á que o estado expón ás mulleres presas.
Porque estamos fartas de que o traballo no fogar, nas terras, e nos coidados funcione como un amortiguador dos efectos devastadores da crise no benestar das persoas.
Por aquelas que hoxe non poden estar, por aquelas que enchedes os vosos balcóns de reivindicación feminista.
Temos a forza para conquistar ese mundo tamén noso, xusto e igualitario. E avanzamos para acadalo desde a insubmisión, a rebeldía e a loita!!
