Santiago de Compostela, 1 de marzo de 2023. A organización estudantil Erguer. Estudantes da Galiza convocará paróns  de 11 a 13 horas en todos os centros de ensino este 8 de marzo. Esta convocatoria encádrase dentro da súa campaña Construíndo feminismo aula a aula e pretende posibilitar a asistencia das estudantes ás mobilizacións convocadas polo Día da Muller Traballadora. 

“É fundamental que as estudantes saiamos á rúa para defender un ensino feminista e non patriarcal, que non siga perpetuando sistematicamente as violencias machistas” explicou Marina Coego, membro do Consello Nacional da organización estudantil. “Convocamos estes paróns coincidindo coas mobilizacións convocadas pola CIG para posibilitar que as estudantes tomen parte destas” engadiu.

Durante estas semanas Erguer. Estudantes da Galiza estivo dando palestras en centros de ensino de todo o país chamando ás estudantes a mobilizarse e participar destes paróns.

“Defendemos un modelo de ensino diferente, que aposte por romper cos roles de xénero establecidos” indicou Marina Coego. “Desde Erguer temos claro que a loita comeza nas aulas pero culmina nas rúas” concluiu.