A Coruña, 4 de novembro de 2024. O decreto emitido pola Alcaldía de A Coruña sobre os proxectos estratéxicos para o mandato 2023-2027, que concentra amplas competencias no portavoz do Goberno Local en actuacións de gran investimento, está a recibir duras críticas por parte do Bloque Nacionalista Galego (BNG). Francisco Jorquera, portavoz do BNG no Concello, considera que esta medida converte en “papel mollado” a remodelación do executivo municipal realizada en xuño pasado, e advirte que aspectos clave da cidade, como a humanización dos barrios e a política social, quedan fóra dos proxectos contemplados.

Jorquera cuestionará esta decisión no Pleno municipal deste xoves, cunha pregunta directa: “Considera o Goberno Local que todos os proxectos da cidade son estratéxicos?”. O portavoz nacionalista censura que, malia a reestruturación do goberno en xuño, que parecía responder ás críticas do BNG sobre a acumulación de competencias, o novo decreto devolve o poder a poucas mans. “Con este decreto, volvemos ao punto de inicio”, afirmou.

O BNG denuncia tamén que o decreto exclúe a humanización dos barrios, parte fundamental do acordo orzamentario entre BNG e PSOE, así como ámbitos esenciais como a política social, a cultura, e a vivenda pública. Para Jorquera, a ausencia de plans concretos sobre vivenda pública no decreto deixa este tema reducido a proxectos urbanísticos, como Visma e As Xubias, sen atender as necesidades de accesibilidade económica e servizos nos barrios.

O deporte, segundo o BNG, tampouco se aborda de maneira axeitada, pois o decreto só menciona a candidatura da cidade para ser sede do mundial de fútbol masculino en 2030, sen incluír actuacións para mellorar as infraestruturas deportivas municipais ou fomentar a práctica deportiva.

O decreto establece que os proxectos estratéxicos deben manter coherencia co Plan Estratéxico 2030-2050. Con todo, Jorquera cuestiona como se pode exixir coherencia cando o plan aínda está en fase de elaboración e carece de dirección despois da dimisión da súa futura directora, sen que esta chegase a formalizar o cargo. O BNG lamenta que os grupos municipais non fosen consultados sobre o desenvolvemento deste plan de futuro, e critica a falta de diálogo e transparencia do executivo municipal.