A Coruña, 18 de novembro de 2024. A confianza entre o Bloque Nacionalista Galego (BNG) e o Goberno Local da Coruña sufriu un duro revés. Durante a súa intervención no Pleno extraordinario celebrado hoxe, Francisco Jorquera, portavoz do grupo municipal do BNG, anunciou que non será posíbel alcanzar un acordo para os orzamentos de 2025 debido ao reiterado incumprimento dos compromisos por parte do Executivo municipal. 

Jorquera deixou claro que a decisión se basea na "creba do principio de confianza" causada pola falta de cumprimento de acordos previos, tanto o de investidura como o orzamentario vixente. "Como anunciamos o 30 de setembro, o BNG condicionaba o inicio das negociacións ao cumprimento do groso dos acordos asinados. Case dous meses despois, constatamos que moitos deses acordos continúan sen ser cumpridos", afirmou.

A denuncia de Jorquera centrouse especialmente no incumprimento relativo á Escola Municipal de Música, que require un suplemento de crédito de 150 mil euros para afrontar o aumento salarial do persoal e gastos necesarios para o funcionamento ordinario. Este financiamento extra, explicou, non sería preciso se o Goberno Local respectase o acordo orzamentario de 2024, que incluía unha dotación de 250 mil euros para a escola e o seu edificio. “Ese diñeiro nunca chegou ao seu destino, senón que se utilizou para reducir o déficit do consorcio”, sinalou o portavoz, engadindo que o concelleiro de Cultura “faltou á verdade” nun pleno anterior.

O modificativo de crédito M6, votado a favor polo BNG por “responsabilidade”, inclúe, entre outros puntos, fondos para o pago de facturas pendentes da Compañía de Tranvías e a compensación de gastos de servizos como BiciCoruña. Porén, segundo Jorquera, este modificativo fúndase en recortes a partidas pactadas co BNG que incluían melloras para centros cívicos, bibliotecas, recintos culturais e proxectos como o Castro de Elviña e o Castelo de San Antón, ademais de actuacións en barrios.

O líder nacionalista subliñou que as explicacións do Goberno Local sobre a falta de tempo para licitar os proxectos carecen de fundamento, xa que é responsabilidade do Executivo impulsar estas iniciativas. Jorquera destacou que as prioridades do Goberno están afastadas dos programas do BNG, polo que a confianza se quebrou e novos acordos serán imposíbeis sen unha restauración desta.

A pesar dalgúns xestos recentes do Goberno Local, como a conxelación de taxas e a suspensión de licenzas nas Percebeiras, Jorquera apuntou que isto non compensa os numerosos incumprimentos. “Quebrouse o principio de confianza necesario en calquera relación entre dúas forzas políticas distintas”, concluíu, reafirmando que sen esa confianza, a colaboración en novos orzamentos é inviable.