O Goberno municipal cuantificou hoxe o impacto que supuxo a pandemia nas contas públicas. Durante o 2020, o confinamento e o peche de servizos supuxeron unha caída histórica dos ingresos municipais por cobro de taxas e prezos públicos. Nese ámbito, o consistorio sumou 39 millóns de euros, 8 millóns menos que o ano anterior polo mesmo concepto.

En total, a recadación municipal quedou 22,1 millóns de euros por debaixo do inicialmente previsto, cunha recadación neta por ingresos e operacións correntes (impostos, taxas, transferencias doutras Administracións e operacións patrimoniais) de 206 millóns de euros, a cifra máis baixa dos últimos anos.

No resultado económico, explicou o concelleiro de Economía, Facenda e Réxime Interior, José Manuel Lage Tuñas, non influiu só o peche de actividades e servizos, coa conseguinte merma na recadación, senón tamén a minoración ou supresión de tarifas aplicadas aos distintos coletivos afectados polas consecuencias da Covid-19.

Así, a redución nos recibos do lixo á hostalaría ou a suspensión do cobro por terrazas, aumentaron a contía final dos fondos previstos e non recadados.

INGRESOS POR TAXAS E PREZOS PÚBLICOS

• 2020: 39.859.143
• 2019: 47.086.450
• 2018: 47.950.841
• 2017: 45.266.867
• 2016: 46.130.842

"No ano da pandemia, ademais, o Goberno de Inés Rey aprobou unha redución de impostos municipais que supuxo deixar de ingresar outros 650.000 euros", indicou Lage Tuñas, quen destacou que aínda nun contexto financeiro difícil para as contas municipais, o executivo fixo un esforzo extraordinario para poñer en marcha un plan de recuperación, o PRESCO, ao que se destinaron 13,2 millóns de euros.

Ademais, indicou o concelleiro e voceiro do Goberno municipal, durante o 2020 o Concello da Coruña acadou a cifra máis elevada da súa historia en transferencias para o pago de axudas sociais, cifra que chegou aos 34,5 millóns de euros, 3 millóns máis que no ano anterior.

Malia o parón da Administración durante o confinamento, o executivo de Rey, por outra banda, mantivo tamén un elevado volume de investimento público, pechando o exercicio con 21,6 millóns en investimentos reais, cifra que dobra á do ano anterior e que supera tamén, con moito, ás dos anos 2016 e 2017.

"Nun ano coma o 2020, con moitos cidadáns pasando por unha situación moi complicada, entendiamos que era a nosa obriga destinar todos os nosos recursos e todos os nosos esforzos a facer fronte aos efectos da pandemia", indicou Lage Tuñas. "O Concello foi moito máis alá das súas competencias, asumindo axudas e investimentos ante a tardanza da Xunta na toma das decisións", explicou o edil.

Lage Tuñas recordou tamén que, a diferenza da Administración autonómica, os concellos non recibiron ningún tipo de ingresos extraordinarios por mor da pandemia e para lle faceren fronte. "A Xunta aprobou os orzamentos máis altos da súa historia grazas ás transferencias do Estado para atallar as consecuencias sociais e económicas da Covid-19, é hora de que se vexan eses investimentos", indicou Lage Tuñas, quen pediu tamén ao Goberno galego que dote de máis medios aos concellos, a Administración máis cercana aos cidadáns, para atallaren a crise.