A Coruña, 30 de abril.- “O labor que fan as organizacións do terceiro sector ten un interese social de primeiro orde e por iso desde o BNG pensamos, e comprometémonos, a apoiar as súas demandas dunha maior axilidade nas tramitacións administrativas e de ter convenios máis estábeis co Concello, porque estas dúas cuestións repercuten directamente na súa capacidade financeira”, dixo Francisco Jorquera, o candidato nacionalista á Alcaldía, despois de visitar esta mañá a Fundación ADCOR, que no seu centro principal na Coruña conta cunha residencia con 32 prazas para maiores e 17 prazas para persoas discapacitadas, e que opera como centro especial de emprego para discapacitados físicos, sensoriais e intelectuais que desenvolven aquí traballos na cociña, na limpeza e na recepción. 

“Esta organización que se dedica a cubrir servizos esenciais alí onde o Estado non chega é ademais exemplar en canto a calidade do servizo e contribúe a dignificación dos residentes e usuarios”, indicou Francisco Jorquera, que visitou a fundación en compañía de Beatriz Gómez Amigo, a número 23 da lista ás municipais, e Alberto García Nicolás, o número 7 da candidatura. Despois de coñecer o programa de pisos tutelados (dous na Coruña, nos que conviven 9 persoas xunto a un monitor),  Jorquera ponderou o esforzo de ADCOR por conseguir a autonomía dos usuario. O candidato nacionalista tamén valorou a aposta da fundación por dotarse de persoal con cualificación, ben remunerado suficiente para manterse por riba dos estándares. “É unha entidade exemplar con clara vocación de servizo público e de manter o emprego nun sector intensivo en man de obra”, indicou.

Os responsábeis do centro sinalaron que na actualidade a financiación é 50% privada (fundamentalmente derivada das prazas privadas da residencia de maiores) e 50% pública, con achegas tamén do Concello. E reclamaron maior dilixencia nos trámites administrativos e que os convenios municipais non sexan “permanentemente cuestionados” e pendentes de si se acordan ou non os orzamentos anuais. Lembraron ademais que nas prazas para maiores, a demanda é superior á oferta, e entre os seus proxectos está unha nova residencia para a que precisan solo público.