A Coruña, 27 de setembro de 2024. - O Bloque Nacionalista Galego (BNG) vén de denunciar que o Goberno Local da Coruña non cumpriu o compromiso de incrementar en 250 mil euros a partida destinada á Escola Municipal de Música (EMM), tal como se acordou durante as negociacións orzamentarias. Mercedes Queixas, concelleira do BNG, expresou a súa preocupación polo impacto deste incumprimento no profesorado e alumnado da escola, que ao longo de 25 anos gañou un notable prestixio.

Segundo Queixas, o incremento de fondos era unha das condicións esenciais para chegar a un acordo orzamentario co Goberno Local, co obxectivo de revitalizar un proxecto educativo e musical que, segundo afirma, leva tempo en situación de abandono. "Até o de agora, o Goberno Local non cumpriu co acordado", subliñou, criticando tamén a falta de compromiso coa comunidade educativa da escola.

O BNG levará esta cuestión ao Pleno do Concello o próximo 3 de outubro, onde Queixas formulará unha pregunta oral para saber en que foi investido o diñeiro que debería terse destinado á EMM. "En que empregou o Goberno Local os 250 mil euros que acordou co BNG para a Escola Municipal de Música?", preguntará no Pleno.

Nos últimos días, o persoal da Escola Municipal de Música realizou mobilizacións esixindo unha xestión directa por parte do Concello, así como máis recursos para fortalecer o proxecto educativo. O concelleiro do BNG, David Soto, participou nunha destas concentracións, celebrada diante das instalacións da escola na rúa da Torre, para apoiar as reivindicacións do persoal.