Outeiro de Rei, 26 de xuño de 2019.- A Casa-Museo Manuel María vén de presentar a VI edición do Convivio da Cultura Galega que se celebrará no Campo de Santa Isabel de Outeiro de Rei o 13 de xullo, sábado.

Todas as galegas e galegos e entidades culturais están convidadas a participaren desta xornada lúdica e festiva, de encontro e recuperación do espírito comunitario das tradicionais romarías, de foliada e xantar demorado..., ao redor da figura de Manuel María, para celebrar a cultura do noso país, Galiza, e o traballo de base que levan a cabo as distintas asociacións culturais.

O encontro, como vén sendo habitual, desenvolverase entre a Casa-Museo Manuel María, no centro da vila de Outeiro, onde se acollerá os participantes a partir das 11.30 da mañá, e a carballeira de Santa Isabel, unha fermosa paraxe natural, situada a menos de 1 quilómetro da casa natal de Manuel María, onde conflúen as augas do río Ladra e de río Miño. Transformada hoxe nunha magnífica área recreativa, o Campo de Santa Isabel foi tradicionalmente o lugar da festa e tamén o lugar dos xogos infantís e das descubertas da natureza, de aí que para Manuel María fose sempre un lugar moi querido e tan presente na súa obra.

O programa para este día será o seguinte:

• 11.30 Acollida na horta da Casa-Museo Manuel María co coro da asociación cultural e musical SOLFA
• 12.30 Ofrenda floral a Manuel María no cemiterio de Outeiro. Intervén o arqueólogo e dinamizador cultural Felipe Senén
• 13.00 Concerto da Banda Municipal de Música "Sons e Soños" de Rábade-Begonte-Outeiro na carballeira de Santa Isabel.
• 14.00 Xantar campestre na carballeira (cada quen ten que traer a súa comida e bebida)
• 17.00 Foliada, para cantar e bailar, con distintos grupos de música tradicional
• ÁS 12.15, no auditorio da Casa-Museo, haberá un encontro das entidades culturais que forman parte da Federación GALIZA CULTURA.