É crucial esta aposta polo "vello" en pleno 2018 porque queremos transmitir a idea de que hai obras que son atemporais, e o que se renova é a visión que podemos exercer sobre elas. Por iso pensamos que é unha mostra de respecto cara ao noso público poder ofrecerlle os filmes no formato no que foron concibidos. A modernidade poñerana a visión dos invitados aos coloquios posteriores á proxección, todos eles representantes de diversos campos da cultura do aquí e agora, como a novísima realizadora Anxos Fazáns, o fotógrafo e cineasta Tono Mejuto, a investigadora e xestora cultural Sabela Mendoza ou a escritora Dores Tembrás.

Así, volveremos ver (ou descubriremos) obras do calado da irrepetible 'A noite do cazador', único filme de Charles Laughton, a xoia oculta 'A ascensión', da cineasta rusa Larisa Shepitko, a obra mestra do cinema mudo 'Amencer' de F. W. Murnau ou a irreverente 'O sentido da vida', dos xeniais Monty Phyton.

Tamén proxectaremos unha das obras maiores do cineasta francés Eric Rohmer, 'O raio verde', a avasalladora ' Mamma Roma' de Pier Paolo Pasolini e comprobaremos se 'O silencio dos cordeiros' xa gañou o seu status de "filme de culto" 27 anos despois da súa estrea. Todas elas conforman unha ollada plural e necesaria ao pasado desde o máis rabioso presente.