A mañá do 24 de xaneiro, Mercedes Queixas, número 2 da candidatura do BNG ao Parlamento de Galiza pola circunscrición coruñesa, realizou unha visita ao espazo sociocultural Galgo Azul, situado no barrio da Agra do Orzán, unha iniciativa que está a xogar un papel fundamental na dinamización sociocultural desta zona.

Queixas, acompañada por Iria Taibo, número 8 da candidatura nacionalista, foi recibida polo responsable do espazo, Juan Rodríguez. Durante a visita, a política destacou a relevancia de iniciativas como Galgo Azul, que traballan para cubrir un baleiro importante na dinamización cultural do barrio.

"Estamos a falar dunha iniciativa que vén cubrir un oco moi importante que estaba pendente no ámbito da dinamización sociocultural do barrio da Agra", sinalou Queixas, subliñando o impacto positivo que este tipo de proxectos teñen na cohesión social e na creación dunha rede de afectos e coñecementos en torno á cultura.

Mercedes Queixas avanzou que un posible goberno galego presidido por Ana Pontón sería "o máis firme aliado da cultura de base, aquela que fai cidade desde os barrios". Neste sentido, contrastou a posición do BNG coa do PP, ao sinalar que o partido popular "confunde cultura con grandes espectáculos, desatendendo o talento e a creación que xorden da propia sociedade galega".

A visita de Queixas a Galgo Azul destaca o compromiso do BNG coa cultura de base, resaltando a importancia de espazos socioculturais que promoven a participación e a creatividade nas comunidades locais. Queixas apunta a unha visión diferente da cultura, centrada na colaboración e valoración do talento local, como elemento fundamental para construír cidades desde a súa base.