A Coruña, 9 de setembro de 2024. O grupo municipal do BNG presentou este luns unha moción na que insta ao Goberno Local a suspender o convenio asinado co fondo de investimento Gingko para o desenvolvemento urbanístico nas Xubias. Segundo declarou a concelleira Avia Veira, responsábel de urbanismo do grupo nacionalista, este convenio, aprobado o pasado 30 de xullo pola Xunta de Goberno Local, “persegue exclusivamente beneficiar intereses privados” e non atendeu en ningún momento ás necesidades da cidadanía coruñesa.

Na conferencia de prensa, Veira anunciou que o BNG proporá no Pleno do vindeiro xoves, 12 de setembro, que se reanude a tramitación da modificación puntual do Plan Xeral de Ordenación Municipal (PXOM) para a zona situada entre a praia de Oza e a Ponte da Pasaxe. Esta modificación, aprobada en marzo de 2022 e avaliada favorablemente pola Xunta en termos ambientais, permitiría unha redución substancial da edificabilidade, pasando das 633 vivendas previstas no PXOM de 2013 a tan só 241, en liña cos obxectivos de desenvolvemento sostíbel e a protección da fachada marítima.

A pesar deste avance, a modificación non foi levada a Pleno, o que, segundo Veira, responde a un interese por favorecer as adquisicións de terreos en As Xubias por parte de Gingko. "A secuencia de compras de terreos por Gingko explica por que non se continuou coa modificación do PXOM para a API S35 da Ría do Burgo", sinalou a concelleira.

Veira criticou duramente a falta de transparencia do Goberno Local e subliñou que o convenio asinado con Gingko non está suxeito á modificación puntual, senón ao PXOM de 2013, que segue en vigor. Ademais, denunciou que non hai ningunha mención á creación de vivendas sociais ou asequíbeis no convenio, malia as afirmacións da alcaldesa Inés Rey.

O BNG tamén puxo de manifesto que o Goberno Local aprobou este acordo sen contar co seu grupo, a pesar de que os seus votos son decisivos para aprobar o Plan Especial ao que o convenio está vinculado. "Non só non contaron con nós, senón que practicaron unha total opacidade para impedir a fiscalización por parte da oposición", engadiu Veira, quen considera grave que tampouco se informase ás veciñas e veciños das Xubias.

Por último, Veira anunciou que o BNG presentará alegacións ao convenio e manterá proximamente unha reunión coa veciñanza para abordar a situación. Tamén reclamaron ao Goberno Local que garanta a continuidade da infraestrutura ferroviaria que percorre a zona, ameazada polo convenio, que podería transformar os camiños de ferro nun paseo para peóns e bicicletas.

En resumo, o BNG considera que este convenio foi deseñado para favorecer os intereses de Gingko, mentres que o Goberno Local renuncia a liderar unha política urbanística coherente para o bordo litoral que vai desde A Pasaxe até a Praia de Oza. "O urbanismo faise a cachos, en lugar de dar unha solución global para toda a zona", concluíu Veira.