A Coruña, 4 de setembro de 2024 - A concelleira do BNG Mercedes Queixas solicitou explicacións ao Goberno local sobre as xestións realizadas para reclamar o pagamento desta cantidade por parte da Xunta, que está poñendo en risco a viabilidade dun proxecto artístico e formativo de referencia a nivel nacional e internacional.

Das tres administracións que financian o Consorcio —Concello, Deputación e Xunta—, esta última é a única que non está a cumprir cos seus compromisos, establecidos nunha achega anual de 3 millóns de euros. Tanto o Concello da Coruña como a Deputación Provincial están ao día nos pagamentos. Non obstante, o incumprimento da Xunta xerou unha situación crítica, especialmente para proxectos asociados á OSG, como a Orquestra Xove e as agrupacións infantís, fundamentais para o desenvolvemento musical e cultural da rexión.

Mercedes Queixas rexistrou unha serie de preguntas dirixidas ao Executivo coruñés, solicitando detalles sobre en que ano comezou a Xunta a incumprir o convenio de financiamento, cal é a cantidade exacta que debe a día de hoxe e que anualidades ingresou desde 2009 para o financiamento da Orquestra. A concelleira tamén quere saber que xestións ten realizado o Goberno local para que a Xunta salde a débeda e cal foi a resposta do Goberno galego para xustificar o seu incumprimento.

Ademais, Queixas, que tamén levará este asunto ao Parlamento galego na súa calidade de deputada, interesouse por coñecer se o Goberno local ten información sobre a partida orzamentaria que a Xunta destinará á Orquestra Sinfónica de Galicia nos orzamentos de 2025.

Esta situación crítica subliña a necesidade urxente de que a Xunta de Galicia cumpra cos seus compromisos financeiros para garantir a continuidade e o éxito dun proxecto cultural que sitúa a Galicia no mapa musical internacional.