Para relatar esta historia de forma fidedigna, Prada reuniu a todos os axentes implicados. Así, por orde de aparición, o documental contou cos seguintes testemuños: Juan Veiga, afectado do Viario 18, Javier Rodríguez, secretario da Asociación de Veciños de Cambre Afectados por Infraestruturas, Amancio Sotillo, presidente de ADEGA, Xosé Pajas, presidente da Asociación de Veciños de Cambre Afectados por Infraestruturas, Eugenia Mantiñán, vogal na mesma entidade, Francisco Menéndez, director da Axencia Galega de Infraestruturas ( AXI), Serafín González, da Sociedade Galega de Historia Natural, e José Antonio Santiso Miramontes, presidente da Reserva de Biosfera Mariñas Coruñesas e Terras do Mandeo.
A historia estivo contada polo cantautor e político Xosé Luís Rivas " Mini". Durante o documental, o concelleiro de Urbanismo e Obras de Cambre explicou as orixes do plan sectorial e as consecuencias que a Vía Ártabra terá sobre a área metropolitana en xeral, e sobre o municipio cambrés, en particular: a máis importante, a destrución do humidal da Gándara, un elemento fundamental da infraestrutura verde do municipio. A Gándara é un espazo protexido polo seu valor patrimonial e, sobre todo, por ser o fogar de catro especies en perigo de extinción, entre elas, a escribenta dás canaveiras.
Cunha traxectoria vinculada ás causas sociais Iago Prada é un realizador e produtor coruñés (natural de Cambre) que estudou realización de audiovisuais e espectáculos na Escola de Imaxe e Son da Coruña. Traballou en todo tipo de pezas audiovisuais por todo o mundo: rodou o documental O raio verde en Cuba e as longametraxes The blue boy e One less god en Australia, entre outros traballos. É autor de obras como A baía en pé, que narra a historia o caso da planta de Delphi de San Francisco, e de Bullfight, un filme no que sete cámaras e dez micrófonos seguen aos touros durante unha corrida. Tal e como Prada recoñece, para el, a zona húmida da Gándara é algo máis que un espazo natural único: " é o lugar onde me criei, onde aprendín a respectar a natureza percorrendo cada un dos seus recunchos. Saber que vai ser destruída para facer unha autovía con área de peaxe resultou duro".
