“Agrela xa non é un polígono industrial, o seu uso mudou cara ao sector terciario, e precisa integrarse mellor na cidade”, explicou Xan Xove durante a súa visita á Asociación Empresarial de Agrela, onde se reuniu coa súa presidenta, Teresa Firvida. Neste encontro, comprometeuse a renovar a mobilidade do parque a partir de 2024, tras o remate da concesión do bus, cunha nova empresa municipal de transportes que traballe man a man coa entidade xestora de Agrela.

A renovación incluirá transporte público, percorridos seguros a pé e aparcamentos disuasorios para facilitar o acceso da clientela. Ademais, garantirase a seguridade nos percorridos, espazos verdes e unha conexión máis permeable coa Avenida de Fisterra, a Rolda de Outeiro e Avenida de Arteixo, facilitando o movemento a pé ou en bicicleta polo seu interior.

Agrela non só precisa adaptarse ás necesidades da súa clientela, senón tamén entenderse coma unha infraestrutura metropolitana, xa que recibe cada día a milleiros de persoas dos concellos veciños en desprazamentos laborais e comerciais. Por iso, o transporte público e as conexións interurbanas terán un papel fundamental na planificación deste cambio na mobilidade.

Ademais, Xan Xove fará cumprir as condicións do contrato de limpeza deseñado pola Marea Atlántica, que destina medios específicos para o parque empresarial de Agrela. A pesar diso, a empresa concesionaria de limpeza viaria continúa percibindo a súa remuneración íntegra, a pesar das deficiencias do servizo que presta.

O Parque da Agrela é un lugar de traballo fundamental na Coruña, e a renovación da súa mobilidade será unha necesidade para adaptarse ás novas demandas da súa clientela. Xan Xove comprométese a traballar conxuntamente coa Asociación Empresarial de Agrela para facer realidade esta actualización.