María Luz ten 55 anos, un traballo eventual, “no que non temos vacacións” e si reclama, como fixo, “chega a ameaza do despedimento. Clemente Pérez ten 53 anos e leva no paro desde o 2010. A súa idade, confesa, “as empresas non nos queren”. Clemente, separado e cunha filla para a que debe achegar cartos para manutención, ten dificultades para chegar a fin de mes. Xoán Carlos Rodríguez é un enxeñeiro técnico que leva catro anos en desemprego. “Tiven que volver a vivir cos meus país para non ter que recorrer a un local social ou  vivir na rúa”. Sabe que un máis dos maiores de 45 anos con grandes problemas para acceder ao mercado laboral porque a pesar da formación, “as empresas non ten ven como un traballador produtivo”.

María, Clemente e Xoán Carlos acompañaron a Ana Pontón, a portavoz parlamentaria do BNG, nunha pasaxe en barco pola ría de Vigo que recreaba unha das escenas máis célebres do filme Os luns ao sol de Fernando León de Aranoa. A formación nacionalista quixo denunciar así a situación dos traballadores galegos nas vésperas do Primeiro de Maio.

Ana Pontón que o luns estará na manifestación convocada pola CIG en Vigo onde, segundo dixo na travesía de onte, “volveremos a pedir que se derroguen as reformas laborais do PP e do PSOE que tanto drama e sufrimento levan provocado”.